Përurohet “Shtëpia e të Moshuarve” në Suharekë, Kastrati: Ky ka qenë projekt i jetës, faleminderit Zotit dhe donatorëve

Të moshuarit do të kenë një vend më të ngrohtë për të jetuar pas përurimit të “Shtëpisë së të Moshuarve” në Suharekë nga Shoqata “Jetimat e Ballkanit”.Kryetari i “Jetimat e Ballkanit”, Halil Kastrati, falënderoi Zotin dhe donatorët për realizimin e projektit që ai e cilësoi si jetësor.Kastrati tregoi se ideja për ndërtimin e kësaj shtëpie i erdhi kur e gjeti të vdekur një të moshuar për të cilin ishin duke u përkujdesur.

“Sot jam me plot emocione dhe nëse gaboj në fjalimin tim mos ma zini për të madhe. Ky ka qenë projekti i jetës time. E falënderoj Zotin dhe juve për realizimin”.“Gjatë kësaj dekade të veprimtarisë tonë bamirëse si shoqatë dhe si person jam përballur me situata të ndryshme qoftë ekonomike, shëndetësore dhe sociale të qytetarëve anë e kënd Kosovës”.“Prekëse, rrëqethëse dhe të pakapërdishme janë rrëfimet e të moshuarve tanë që nuk kanë shijuar mundësinë të jenë prindër”.

“Po i ndaj dy momente që ishin vendimtare që të mendoj për një projekt si ky. Ne përkujdesemi për të moshuar pa përkujdesje dhe çdo muaj i furnizojmë me gjëra ushqimore. Njërin nga pleqtë që e vizituam kishte ndërruar jetë pa e parë askush dhe me sy hapur. E një tjetër më tha “ti ke ledhatuar shumë jetimë dhe më lejo të t’i puth duart”. E falënderoj Zotin dhe të gjithë donatorët që ma mundësuan që unë të ledhatoj kokën e të moshuarve”, deklaroi Kastrati.Ndër shumë personalitete shtetërore ishte edhe ministri i Shëndetësisë, Armend Zemaj, i cili premtoi ndihmë mjekësore për të gjithë banorët e kësaj shtëpie.

“E falënderoj Halilin, shoqatën e tij dhe 3000 njerëzi human që i janë bashkangjitur këtij veprimi fisnik për ndërtimin e kësaj shtëpie. Si institucione është obligim ndihmesa ndaj kësaj iniciative”.“Do t’i marrim të gjitha obligimet për të ndihmuar në mënyrë mjekësore personat që qëndrojnë në këtë shtëpi. E gëzofshin shtëpinë të gjithë ata që do të qëndrojnë këtu”, deklaroi Zemaj.Shtëpia e të moshuarve ka kapacitete për mbi 100 të moshuar dhe kuzhina ka kapacitete për të ushqyer 250 persona.Janë rreth 80 dhoma gjumi, pesë dhoma për trajtim mjekësor, dhomë për stomatolog.Shtëpia e të Moshuarve ka edhe pishinë brenda si dhe dhomë për floktar.

Leave a Reply

Your email address will not be published. Required fields are marked *